Click to listen highlighted text! Powered By GSpeech
Get Adobe Flash player
المجموعة 73 مؤرخين **** مؤسسة ثقافية لنشر الوعي بالبطولات المصرية *** مشهرة برقم 10257 لسنه 2016 ***

انا الشهيد مجند مصطفى خضر سليم

 


"
زى مااتفقنا طلابى الأعزاء هانفتح مع بعض كتاب التاريخ وهانقلب فى كل صفحاته اللى بتتكلم عن ابطال مصر والنهاردة كلامنا هايكون عن بطل من ابطالنا اللى ضحوا بروحهم علشان الوطن عاوزاكم تتعرفوا عليه معايا ..يوم 7 اكتوبر هاتمر خمس سنين على رحيل البطل اللى هانتكلم عنه النهاردة , بطل من ابطال مصر اللى كانوا بيحبوها اوى , واللى كان مستعد كل لحظة يقدم روحه فداها , واللى كانت كل حياته شغل وعمل رغم صغر سنه ..بطل حقيقى ضمن ابطال كتيرة بتحب مصر اوى .. يلا نبدأ "

-     اسمه ايه البطل يامس ؟


- اسمه البطل الشهيد مجند مصطفى خضر سليم .. ابن محافظة بورسعيد , كان ابن طيب لأب وأم ربوه على الأخلاق والقيم والمبادىء والاعتماد على النفس واهم حاجة علموها ليه هى حب العمل ايا كان العمل ده إيه طالما كان عمل شريف , البطل مصطفى ياولاد كان شعاره العمل .. اشتغل اكتر من شغل , بعد ماجاب مجموعة كبير فى الإعدادية مارضاش يدخل ثانوية عامة وقرر انه يدخل تعليم صناعى منازل , قرر البطل انه يتحمل مسئولية الأسرة لأن كان والده تعبان والأطباء منعوه من العمل لأن ده كان هايتعبه بعد العملية اللى عملها , اشتغل البطل مصطفى فى كل حاجة وماتوقفش , كان عاوز يرد جميل ابوه وامه عليه وماكنش عاوز يشيلهم هموم ابدا لأنه اتربى انه يكون راجل يتحمل المسئولية فى وقت الشدة او الأزمة .


- اشتغل فى ايه يامس البطل مصطفى ؟


اشتغل فى استثمار الملابس واشتغل فى بيع وشراء الشنط والاحذية وكان كمان الوقت المسائى كان بيشتغل مصور فى الافراح , اشتغل فى حاجات كتيرة علشان يتحمل مسئولية اسرته , شوفتوا ازاى البطل كان ماشى بمبدأ العمل عبادة , جديته فى العمل وانه يتحمل المسئولية خلته يشتغل كتير وحتى لما راح الجيش كان لما ينزل اجازة يشتغل على تاكسى عمره ماتكسف من اى عمل شريف علشان كدة ربنا كافئه بالجنة .. كان دايما شايف ان العمل هو اللى بيخلق انسان مسئول له قيمة فى الحياة شوفتوا بطولة اجمل من دى ؟
, كان بطل فعلا مميز وكانت كل ماوالدته تقوله لازم ترتاح يرفض ويقولها مش عاوزك تتعبى ياامى لوحدك انا هنا انا معاكى , كان راجل بمعنى الكلمة واتربى على ان العمل عبادة وان كل انسان لازم يشتغل ويثبت نفسه لأن فيه شباب كتير اوى مابتشتغلش ورافض يعتمد على نفسه وبيضيع وقته فى حاجات كتيرة مش مفيدة , وده غلط على مجتمعنا وهايضر بلدنا لازم كلنا نشتغل ونعمل زى البطل مصطفى ونحب اى شغل نشتغله مادام عمل شريف علشان نخلى مصر احسن بلد فى الدنيا

البطل استشهد ازاى يامس ؟

البطل مصطفى كان نفسه يموت شهيد , كل يوم كان بيتمنى الشهادة ولما باباه ومامته كانوا بيبقوا خايفين عليه كان يقولوهم انا عاوز اموت شهيد علشان تفخروا بيا وتقولوا انكم طلعتم لـ مصر راجل بيحبها وبيفديها بروحه .

البطل استشهد ومعاه خمسة من ابطالنا المجندين اصدقائه بمنطقة اسمها الصالحية فى الاسماعيلية , مش هو اللى كان هايطلع المهمة دى ولكن صديقه كان تعبان اليوم ده وهو راح بداله والبطل راكب العربية العسكرية اللى كانت بتنقل الأكل لمعسكرات ابطالنا قابلتهم عربية ملاكى فيها ارهابيين وضربوا عليهم نار ناحيتهم وهما راكبين العربية , البطل مصطفى اتصاب بالرصاص لكن فضل سايق ومكمل وكل التعليمات اللى قائده قاله عليها نفذها وماسبش مكانه ياولاد .. البطل مصطفى استشهد فى مكانه وفى عمله وفضل يسوق العربية بمنتهى الشجاعة لحد ماالارهابيين بدأو يستخدموا الاسلحة الثقيلة وفاضت روحه للسما بعد الحادث الارهابى الغادر ده .

- الشهيد مصطفى كان بطل حقيقى يامس احنا هانطلع زيه لما نكبر.

ماهو علشان كدة انا بحكيلكم حكاية البطل ده .. لأنه ببساطة بطل ماينفعش ننساه ولاننسى انه مات بطل شجاع , لازم نتكلم عنه ونفتكره هو وكل ابطالنا اللى استشهدوا علشان بلدنا تعيش .. علشان مصر ياولاد فاهمين يعنى ايه مصر بلدنا يدخلها ارهابيين او ناس مش كويسه اهو ابطالنا بقى بيدافعوا عن مصر علشان نعيش فى أمان , علشان كدة احنا لازم نكرمهم فى كل مكان

- يعنى ايه نكرمهم ؟

يعنى نحكى عنهم .. ماننساهمش ولاننسى بطولاتهم واسمائهم وصورهم , يعنى نرسمهم فى كراساتنا فى حصة الرسم ونكتب عنهم فى حصة التعبير ونحكى عنهم فى الاذاعة المدرسية كل يوم قصة بطل , يعنى نسمى مدارسنا والاماكن المهمة بأسمائهم علشان يفضل اسمهم موجود والناس تفتكرهم , يعنى يتكرموا فى كل مكان , يعنى بلدنا تتكلم عنهم , يعنى نلاقيهم ابطال مسلسلاتنا فى التليفزيون علشان يبقوا القدوة , ويتعمل لهم افلام تجسد بطولاتهم علشان يفضلوا على البال .. فهمتوا ازاى ؟

- طيب واحنا دورنا ايه بقى يامس .. نعمل ايه علشان نكرم البطل مصطفى هو واصحابه الابطال ؟

- كل يوم هانخصص وقت نحكى فيه عن بطل من ابطالنا , زى ماتكلمنا عن الشهيد البطل مصطفى خضر سليم هانحكى عن كل الابطال وعن الحاجات اللى عملوها علشان مصر , وهاجيبلكم صورهم كمان علشان تشوفوهم , كل يوم هانحكى عنهم , وهانتكلم عنهم فى الاذاعة المدرسية كمان ..هانحكى عن بطولاتهم علشان تفتخروا بيهم وبمصر وتعرفوا ان فيها ابطال شجعان بيحموكم علشان تعيشوا فى أمان .. اوعوا تنسوا البطل مصطفى ويلا بينا كلنا نقرأ له الفاتحة وندعيله بالرحمه وبكرة ان شاء الله نحكى عن بطولة عظيمة لـ بطل شجاع جديد


بقلم

نسمة فتحى سراج

30/9/2018

Share
Click to listen highlighted text! Powered By GSpeech