Click to listen highlighted text! Powered By GSpeech
Get Adobe Flash player
تابعونا علي قناة اليوتيوب 400+ فيديو حتي الان **** تابعونا علي صفحات التواصل الاجتماعي ***** تفاصيل العضوية في المجموعة داخل الموقع **** استخدم خانة البحث لمعرفة ما تريد بسرعة

أنا بنت الشهيد


انــا بـنـت الشـهيــد

لـ نسمة سراج



::
صباح الخير يابابا ... صباح الخير على المحارب , المقاتل , الفارس , الجسور أبى , بكتبلك النهاردة رسالتى التلاتين زى عادتى كل يوم .
أنا متأكدة أن كل رسايلى بتوصلك وروحك بتحس بيها , لأنك معايا فى كل مكان محاوطنى ومش سايبنى , علشان كدة مابطلتش اكتبلك رسايل من يوم استشهادك .
بابا انت وحشتنى اوى ووحشنا تكون معانا دايما , امبارح كان عيد ميلادى زى ماانت عارف عملنا تورتة عليها صورتى انا وانت لما كنت شايلنى فى البحر واحنا فى المصيف فاكر يابابا الصورة دى .. يومها عشت اجمل لحظات حياتى , كنت تاخدنى البحر ونفضل نلعب انا وانت ومهما كان بيزيد خوفى من البحر كنت بتطمنى وتقولى ماتخافيش , وفضلت ورايا لحد ماعلمتنى السباحة وخلتنى اواجه الموج العالى وماخافش .. كنت ضهر وسند بعد ربنا يابابا .

محتاجة اوى اسمع كلمة " انا معاكى ماتخافيش " كانت بتطمنى لأنى عمرى ماخوفت وانت معايا , علمتنى اكون زى الجندى على الجبهة احارب مخاوفى والالامى واليأس مايعرفش طريقه لقلبى مهما كان , كنت دايما تقولى الألم هايخليكى انسانة قوية وهايخلق منك شخص معافر محارب , خوضى التجارب وماتخافيش , علمتنى يكون سلاحى الايمان والصبر والتفاؤل والفخر .. الفخر بيك يابابا انا فخورة بيك , فخورة ان ابويا فارس ماكنش هدفه الناس تشاور عليه وتقول بطل .. مالوش فى الشهرة ولا كتير الكلام , بيحب الوطن بضمير وبيمارس عمله بضمير , كانت كل الناس بتحبه , ودفعته بتحترمه وبتهابه وعارفه قيمته .
كان حبك لوطنك مختلف , فريد ,مش زى اى حد , علشان كدة بكتبلك كل يوم علشان اقولك انى عايشة بالفخر ده انا وماما واخواتى وعيلتنا كلها ,بنقعد كل يوم نتكلم عنك وعن بطولاتك اللى لو نسيوها احنا ماننسهاش ولو ماافتكروش انت مين احنا فاكرين , سيرتك اصلها ماينفعش تتنسى ولاهى صفحة عادية من صفحات تاريخ البلد دى , الناس بقت تقولى "يا بطلة يابنت الشهيد " بقوا يشاوروا عليا وفخورين بيا صحيح بشوف فى عيونهم شقفة وحزن و دموع .. دموع اليتم لكن انا اتعلمت منك ازاى اكون قوية مخافش وابقى قوة لأسرتى ولكل اللى بحبهم , نظرة الشفقة مش عاوزاها يابابا يانظرة فخرواعتزاز يا إما بلاش !

بابا اوعدك انى هاكمل مشوارك , يمكن مش هامسك سلاح احارب بيه عدونا اللى بقى فى كل مكان زى سرطان بينهش فى جسد الوطن , الارهابى اللى حرمنى منك انا وكتير بنات وولاد زى , لكن هامسك سلاح العلم والايمان والصبر , هاقوى بعلمى علشان احارب جهله .. هانجح فى مدرستى وهابقى من الاوائل وهاذاكر وادخل الكلية اللى انا وانت اتفقنا عليها وكان نفسك ادخلها علشان احقق ذاتى "كلية الفنون الجميلة " كنت بتقولى دايما انتى بنتى الفنانة لازم نأهلك تبقى فنانة كبيرة وتعملى معارض وتورى فنك للناس وتبقى صورة مشرفة لبلدك , كنت مؤمن بيا يابابا وفخور وكنت بتشجع وتحمس بكل حب وكنت دايما توصى ماما انى اكمل مشوارى .

اوعدك يابابا انا مش هاكون انسانة ضعيفة , هاتحدى الظروف والصعاب وهابقى قوية بربنا وعيلتى وبيك .. هابقى قوية علشان احكى للعالم عنك واخلد سيرتك واتكلم عن كل الابطال اللى زييك اللى ضحوا بروحهم فدا الارض والعرض والشرف والكرامة.. المجاهدين الحقيقيين فى سبيل الله , علشان احكى عنكم وعن بيوتكم اللى سبتوها علشان الوطن وولادكم اللى فقدوا احلى مافى الحياة , هانحارب علشان نكون امتداد لسيرتكم ولما يشوفونا متفوقين ومميزين يقولوا فعلا ان الشهيد حى مامتش وانه سايب وراه اللى هايخلد اسمه طول العمر .
ان شاء الله هاكون قوية يابابا وعارف اول ماابقى فنانة كبيرة هارسملك اكبر صورة وهارسم كل الابطال وهاعمل معارض ألف بيها العالم علشان احكى عنكم
وهاحارب علشان تفضلوا احياء فى ذاكرة الوطن , ومش هاستسلم ولا هاتراجع ولاهايأس ولاهاخاف .. وجودك حواليا مطمنى , انت الغايب الحاضر.. غيابك الجسدى مش معناه غياب روحك ابدا , انت كل يوم معايا بتساند وتدعم وتحفز وتطبطب وتضم وتقولى انا هنا ياروح بابا .
تصبح على خير دلوقتى وبكرة هابعتلك رسالة جديدة هاحكيلك عن حاجات كتيرة اوى لسه ماقولتهاش وزى ماوعدتك هافضل فاكرة بيت الشعر اللى قاله شاعرك المفضل محمود درويش واللى حطاها ادامى حافز لما قال
الجميلات هُنَّ القويّاتُ
يأسٌ يضيء ولا يحترقْ
::
لـ نسمة سراج

15/9/2019

Share
Click to listen highlighted text! Powered By GSpeech