لو العمر لحظه - عيشها زي منسي

الشهيد احمد صابر منسى

منسى مش منسى

-----

كتبت نسمة سراج

لو العمر لحظه .. عيشها منسى

من عجائب القدر ان هذا الرجل يحمل اسم " منسى "

البطل الذى اصبح " مش منسى " ومخلدا الى الابد

بعد استشهاده مع كتيبته

انه البطل الشهيد القائد عقيد اركان حرب || احمد صابر منسى
قائد الكتيبة 103 صاعقه

بطل فرقة السيل رقم 1 و US NAVY SEAL رقم 258

------

الجميل بكل ماتحمله الكلمة من معانى الجمال

كل معانى البطولة والصمود تجسدت فى هذا المنسى

قائد , بطل , شجاع , راجل , مواقفه تسبقه , وسيرته اصبحت اكثر شىء ملهم يحكى عنه الناس

بفضل شخصيته العسكرية وعقيدة الانتصار التى كان يؤمن بها وكل كتيبته

المرحب بالشهادة .. المبتهج بالموت فى سبيل الله

يقول عنه احد زملائه " محمد طارق "
سورة الأنفال الأية رقم 14 و 15 اللىربنا بيخاطب فيها المؤمنين وبيحذرهم أنهم إذا قابلوا العدو يثبتو
أحمد كان بيحفظ الأيات دى لرجالته ويشرحلهم معناها ويرسخها جواهم وبيديها لزملائه الضباط و يصر أنهم يحفظوها للجنود ويشرحوها و يفسروها علشان لما تيجى لحظة إختبار حقيقية يكونوا ثابتين بقلوبهم قبل ثباتهم بسلاحهم و معداتهم ، ثبات القلب على شئ أنت مؤمن بيه أقوى بكتير أوى من ثبات السلاح لأنك لو ثابت بسلاحك و سلاحك عطل أو ذخيرتك خلصت ثباتك هو كمان هيخلص لكن لو ثابت بقلبك هتقاتل حتى لو ايدك فاضيه و ده اللى خلى محمود على الجيزى من أبطال المجموعة 39 قتال مجموعة الشهيد إبراهيم الرفاعى أمير الشهداء لما حاصروه فى كهف فضل يقاتل لحد اخر طلقه و رفض الإستسلام تماما رغم أنه بطوله و قدامه فصيلة مظلات إسرائيليه كامله و فى الأخر طلع وقفلهم زى الوحش ومربع إيديه ومعلق سلاحه على جسمه كأنه بيفرجهم نفسه وبيقولهم أنا بطولى اللى عملت فيكم كل الخساير دى ومش خايف من الموت و أدينى واقف أهه بمنتهى العزه والشموخ باواجه الموت لكن لا يمكن أستسلم أبدا ، وهما مرعوبين منه لدرجة أنهم كانوا خايفين يقربوا منه حتى بعد ما خلصوا ذخيرتهم على جسده الطاهر كأنه أسد خايفين يقتربوا منه حتى بعد موته ، ثبات القلب مرعب وخارج كل الحسابات المنطقيه و الأسطورة ( أحمد صابر منسى ) كان ربنا مثبت قلبه و مطمن روحه و مصفى نفسه علشان كده كل الناس اللى يعرفوه و عاشروه و أشتغلوا معاه أو حتى صاحبوه بره الشغل و بعيد عن مجاله تماما ماستغربوش خاااالص من ثباته فى لحظاته الأخيره لأنه كان ثابت القلب و الروح راسخ العقيدة مقبل على الشهادة و ربنا عارف مدى صدقه فى طلبه للشهادة و ربنا كريم أووووى فأكرمه خير كرم و منحه خير الدرجات فى الدنيا و الأخرة ..

-----

فى الواقع منسى بالفعل " مش منسى "
يحكى عنه الان الالاف .. يسردون مواقفهم وحكاويهم

عن تواضع هذا الانسان وبساطته ورقيه فى معاملة الجنود والضباط دون التفرقة بينهم

عن خفة دمه التى اشتهر بها ومواقفه المضحكة التى لاينساها من احبوه وعرفوه يوما

عن انسانيته فى التعامل مع بعض المواقف الانسانية

لـ جنوده كالذى يود ان ينزل اجازة للاحتفال بالعيد مع اسرته وغيرها من مواقف كثير مازالوا يحكونها وستظل تروى لتسطر فى التاريخ

----

سيرة " منسى " خالدة

انسانية " منسى " ممنوعة من النسيان

روح " منسى " تعيش بيننا

فـ الارواح النقية لاترحل

ستجدها تسكن داخل عصفور اخضر

يأتيك كل صباح

ستجدها فى قلب كل انسان عرف هذا البطل

وتعرف عليه من قرب بلا تكلف ولامبالغة

" منسى " استشهد لـ يحيا الى الابد

كأسطورة مخلدة كُتب لها ان تبقى

رحم الله البطل احمد صابر منسى

____

سألت بعض من اصدقاء البطل عن مواقف لهم معه

وكانت تلك كلماتهم .. اترككم معها

* محمد عاطف || كان قائد السريه وكنت بخدم تحت قيادة كان مثل للرجاله والاحترام

________

* احمد سعيد || اقسم بالله اقسم بالله اقسم بالله مهما حكانا مش هتزهقى وهتشتاقى اكتر الله يرحمه تاريخ لزم يدرس والله

________

اكرم شاكر ||
صراحه هو كان واسطه بتاعتي في جيش كان معرفه لواء شرطه قريبي وكان صاحبه اوي فجت توصيه منه عليا وجالي وانا في اخر الفرقه ومتبهدل وبيسال عليا وبيقول اني بشتكي قلتله لا مشتكش من حاجه واتعودت خلاص الحمد لله فضحك وقالي ده لعب لسه التقيل جاي واجمد كده وبقينانتواصل مع بعض لحد ماراح بعثه واتصال اتقطع بينا ولما رجع ومسك قائد ك103في سينا اتواصلنا تاني وكنا اصدقاءعلي الفيس لحد مااستشهد رحمه الله عليه كانت الاخلاق ماشيه علي الارض

_________

شريف كامل

كان فى يوم خارج من البوابه تقريبا الساعه ٤ ونص بعد العصر وانا شوفتو ماشى بالعربيه فضلت وراه قربت منه بعربيتى بصلى فى المرايا شاورلى بايدو وانا وراه كالمعتاد بضحكتو الجميله البريئه فضلت وراه راح راكان العربيه ونزل اخدنى بالحضن وقلى يا كامل انا عاوز اجيبك عندى الكتيبه ٩٣ قلتلو ده شرف ليه يا فندم قلى بجد يعنى موافق قلتلو انا اخدمك بعنيه بس هو راح سينا علشان صدق مع ربنا علشان كده ربنا صدقه ومواقف كتير اوى مهما نحكى مش هنوفى ده كان اسطوره ومازال اسطوره لن تتكرر الله يرحمه ويحسن إليه الشهيد البطل دائما فى القلب يا اغلى الناس منسى لا ينسى بفضل الله

اقسملك بالله العظيم انا بحس انو عايش معانا ورحتلو يوم الجمعه الى عدت الساعه ٩ الصبح وكلمتو وقلتو كنت عاوز تخدنى عندك انا جيت الكتيبه الى جمبك كان انسان بكل مقاييس العالم بجد

___________

احمد جمال

مرة جالي الكافيه وكان عندي حد من زباين الكافيه ألماني كان الألماني ده غريب شوية بيتكلم أكثر من لغة و بيلعب لعبة قتالية عنيفة وكنا بنروح مع بعض الجيم وانا بحب يبقي طول الوقت ليه صديق أجنبي عشان اللغة متصديش ...المهم قلت لأحمد الله يرحمه تعالي اعرفك عليه اتكلموا في حجات كتير دين سياسة لكن اللي تفاجئت بيه ان أحمد عايز يتمرن معاه اللعبه القتالية فاستغربت جدا ايه يا عم دانت تمرن عشرة زيه بعدها لقيت احمد بيقولي حاول تبعد عن الراجل ده قلتله ليه أنت تعرف عنه حاجة قالي لسه بس هعرف قلبي مش مطمنله المهم قصر معاه ... يعني انت يا احمد من قعدة قررت ده مع اني مش حاسس ان في حاجة مريبة في القاعدة كلها مفيش بعدها بفترة صغيرة عرفت ان الألماني ده متورط في قضية إرهاب كبيرة في الوقت ده الكلام ده قبل الثورة لما قابلته بعدها قلتله نفسي اعرف ايه اللي شكك في الراجل ده ....ضحك وبص في الأرض وقالي قلب المؤمن دليله....الله يرحمك يا جنرال

____________

حسام التركى

من احسن الايام بالنسبالي ف الكتيبة لما العقيد منسي كان هو اللي بياخد الطابور لان بجد كلنا كنا بنتعلم من كلامه كتير كان بالنسبالنا اخ اكبر قبل قائد وكان اكتر حاجة بتضايقه ان طلقه تضرب ف الهوا كان يقول الطلقة دي اهالينا بتدفع دم قلبها عشان توفرها للعساكر فالطلقه عنده بتكفيري

____________

على حمد الله

انا بقى كان القائد بتاعي في 2008نقيب قائد س2..ك143صاعقة...وكنا في مشروع حرب...واول ما عرف اني بتكلم انجليزي شوية ..بقا مل مايشوفني يديني امر بالانجليزي...وانا وحظي لو فهمتوا بنفذ ..مافهمتوش ..ارقد وازحف علي طول مافيش نقاش...وهو يضحك ويقول انتباه....ومرة كان المقدم قائد الكتيبة ايهاب احمد محمد...وقتها ..كانو الاتنين نسخة من بعض ...اختارونا للقفز في النجم الساطع...وهو عارف اني كنت بهرب من قفز المظلات ....راح دخل للمقدم ايهاب وجابلي تصريح اجازة ..وقعد يضحك عليا وقاللي احسن ما تموت مننا فالطيارة ....مدت منه التصريح وقطعته....قعد يضحك ..وقاللي ماتفتكرش نفسك هتزوغ...هتقفز قدامي فالتدريب وفعلا كان معانا فالقفزة...الله يرحمه

__________

سيد احمد عبد الرحمن

بعد اذنك ممنوع تعدي يا فندم اتفضل ادخل من ارض الإصطفاف قالي وسع ياد يا شمال انت احسن انفخك انت والمقدم بتاعك واداني شويه عصير وعدي هزار اخ مع اجمل ابتسامه للمقدم المنسي وانا في الجيش الله يرحمه

_____

حاتم ناجى

كان من عادته اما يرجع من أجازة وقبل مايدخل المبيت عشان يغير هدومه كان يعدي يسلم علينا الأول وبعد كدا يدخل يغير نكون جهزنا الشاي.... في المرة دي قعد معانا بهدومه وحسينا ان فيه حاجه مفرحاه... وكنا عارفين انه في الأجازة كان فيه تكريم ليه في القيادة العامة ....فبقوله طبعا محدش أدك جاي من تكريم وأجازة ونفسيتك عنب..... كان كلامنا معاه مش رئيس ومرؤوس... هو كان حابب يكون قريب من كل الناس..... فقالي اه والله بس مش عشان تكريم واجازة قولتله امال اية.. قالي مش هتصدق قابلت مين وسلمت عليهواتكلمت معاه.... فطبيعي اي حد يفكر انه قابل رئيس الجمهورية... خاصة انه كان في تكريم... قولتله مين ياتري... قالي والفرحة باينة اوي في عنيه قابلت ابو الشهيد عادل واتكلمت معاه وأخدت رقم تليفونه كمان.......
الشهيد / عادل احمد ذكي دا كان جندي في الكتيبة واستشهد هو والشهيد /السيد احمد عليوة في قرية المهدية يوم 20/12/2013 يعني قبل ماهو يجي الكتيبة بس عرف ان دول اول شهداء الكتيبة. ......كان فرحان اوي انه قابل والد شهيد هو معرفوش ولا شافه...
احنا كمان فرحانين وفخورين بيك وبشهادتك..... لأنك أحق الناس بيها.......وعلي قد فرحتنا بشهادتك علي قد حزننا علي فراقك يا أعز وأغلي الناس علي قلوبنا جميعا..... قلوب اللي عرفوك .......وقلوب اللي سمعوا عنك..
ربنا يجمعنا واياك في جنات النعيم... ياضحكة من الجنة