الكاتب : اللواء طيار محمد عبد المنعم زكي عكاشه قصه من المجموعه القصصيه قصر في الجنه

تنويه: بند الأوامر هو تسجيل كتابي لكل حدث للوحدة العسكرية أو الأفراد

-         قول إسمك مظبوط يا تحفة.

-         1065 طالب مستجد بالكلية الحربية تحت الاختبار أحمد علي إبراهيم محمد يا فندم.

 شهر ونصف فترة الاختبار، الفصيلة 3، نوبة صحيان الساعة السادسة صباحا، الزيارة يوم الجمعة، اختراق ضاحية ثمانية كيلومترات، الشعر محلوق نمرة 3، خدمة برنجي على البوابة .

-         بند أوامـر رقم 76 تصدق لطلبة الدفعة 42 بإجازة اعتبارا من 20 /11/1959

مدرج ناصر، محاضرة تكتيك. الكتيبة تحتل مواقعها في 2 نسق. دورية السير أربعون كيلو متر لمدة ثلاثة أيام. حفل التخرج. رغبه أولى صاعقة.

-         حمد الله علي السلامة، وأهلا بكم في الكتيبة .

-         بند أوامـر رقم 315 تقرر انضمام السادة الضباط الآتية أسماؤهم إلى الكتيبة 25 صاعقة.

نوبة صحيان الساعة الخامسة، جرى ثمان لفات حول المعسكر، دورية قتال ثلاثة أيام، القفز من ارتفاع عشرين متر في الميٍه، دورية إعاشة بدون أكل أو ميًه.. تجديف خمسون كيلو متر مع الهجوم. المرتب ثمانية وعشرون جنيه.

-         تفتكر بعد عشر سنين حاتفضل تحبني كده ؟.

-         لو بعد ميت سنة برضه يا ناهد حا أحبك.. نفسي لما نتجوز نخلف 3 صبيان.

-         بند أوامـر رقم 512 تتحرك الكتيبة 25 صاعقة إلي اليمن اعتبارا من 20 /9 /1964

المسافة ألفان كيلومتر من القاهرة، لابد من اثنين خدمة طوال 24 ساعة لحماية مخزن الذخيرة، المتسللين اليمنيين هاجمونا ثلاث مرات, لازم نهاجم إحنا المرة دى، الهجوم بعد منتصف الليل، القوة صغيرة علي الهجوم، قدامنا مئتان متسلل يمني علي الأقل. نجده من السرية 19، حاصرونا من ثلاث جهات. الضرب شديد علينا، لو استحملنا لغاية الفجر حانخرج من الحصار، يارب مائة ركعة لو طلع علينا النهار، النجدة وصلت قبل الميعاد.

-         أصل الشقة لازم تكون 2 نوم وصالون وسفرة وأنتريه.

-         الراجل عايز ثلاثمائة جنيه مقدم، حا يبقي فاضل معايا أربعمائة، نعمل الفرح الأسبوع الأول من أبريل. قولي لبابا.

-    بند أوامـر رقم 541 تصدق للنقيب أحمد علي إبراهيم بإجازة سبعة أيام اعتبارا من 2/4/1967. السرية طلعت الأولى علي مستوي سرايا الصاعقة كلها، مجهود ممتاز يا أحمد.

-         بند أوامـر رقم 614 تعين النقيب أحمد علي إبراهيم محمد قائدا للسرية17 اعتبار من….

-    بند أوامـر رقم 678 تتحرك السرية 17 إلي ممر متلا والتمركز عند علامة الكيلو متر54،  تمام الاستعداد الساعة 600 يوم 17 مايو 1967 .

عبور القناة، احتلال التبة 145 ، كل الطوارئ دي ومش باين أي حاجة. زيارة المشير عامر للوحدات في سيناء يوم 5 يونيو..

-         بند أوامر رقم 684 وصول عدد 72 جندي احتياط يوم 3 يونيو 1967

الاستعداد لزيارة القائد العام الساعة التاسعة صباحا، الهجوم على عشرة مطارات مصرية في نفس التوقيت، إسقاط 86 طائرة إسرائيلية خلال أربع ساعات، الانسحاب غرب القناة يوم6 يونيو، قرار وقف إطلاق النار

-         أحمد ، موقف السرية 17 إيه ؟.

-         نسبة الاستكمال في السرية 55% عندي شهداء كثير يافندم.

-         بند أوامر رقم 763 استشهد الآتي أسماؤهم بعد….

 التمركز 9 كيلو متر شمال الإسماعيلية ، إسرائيل أخذت 200 كيلو وبقت على بعد 180متر، قصف جوي على السويس ، مستوي السرية في التدريب 65%  إعادة اختبار للسرية بعد 45 يوم.

-         بند أوامر رقم781  تصدق بإجازة 24 ساعة للنقيب أحمد على إبراهيم.

-         يا والدي إحنا نقدر نهزم اليهود والله العظيم.

-         يا بني انتم قدامكم عشرين سنة على ما تقدروا تحاربوا ثاني.

-         معقول يا عمي حا نقعد عشرين سنة في الحال ده ؟.

-         يا بنتي يا ناهد الإنجليز احتلونا 80 سنة.

-    بس إحنا يا بابا مش حا نعمل زيكم ، مظاهرات ومفاوضات وبس ، إحنا كلها سنة وآلا أتنين ولازم حرب ثاني مع إسرائيل . يا بابا إحنا ما حاربناش في 67.

-         خلاص يا أحمد أنقل نفسك في حته قريبه بقي ما دام الحكاية حاتطول.

-         من فضلك يا ناهد الموضوع ده بيضايقني ومش عايز هزار فيه.

نسبة استكمال المعدات 85 %، 3 طابور نهاري+ 3 ليلي. معقول حا نقعد عشرين سنة لما نحارب تاني، 9 مارس استشهاد الفريـق عبد المنعم رياض أثناء زيارته للجبهة، اشتباك بالمدفعية خمس ساعات. استدعاء لمكتب قائد الكتيبة

-    السرية بتاعتك تجهز لعملية عبور واشتباك مع اليهود. مطلوب إحضار اثنين أسرى يهود. قدامك عشرة أيام تجهز نفسك للتدريب وتجهيز المعدات، عايز شغل رجالة100%.عايزين عملية ناجحة إن شاء الله. تعرض علي خطتك بعد ثلاثة أيام، المدفعية بتاعتنا حاتعمل لكم ستارة نيران شرق القناة علي بعد ستمائة متر من الموقع، ولما تبلغ انتهاء العملية تبدأ المدفعية في الضرب لحمايتكم في العودة.

ساعة (س) الثالثة صباحا. مجموعة الاقتحام الأولي معايا والثانية مع حسن الغمـري، المجموعة الساترة مع حسين. مطلوب أربعه قارب مطاط+ 1 احتياطي. موجود ثلاث نضارات رؤية ليلية، بس مش مهم، 2 من كل مجموعة مخصصين للأسرى، الليلة 12 عربي والقمر حا يساعدنا كثير.

-         أول ماترجعوا بالسلامة حاتلاقوا الشاى جاهز وعلى حسابي.

-         تصور يافندم بتاع دمياط حايعزمنا على شاى.

-         الساعة دلوقت 2 توكلنا علي الله يارجالة، الدورية اليهودي3 دبابات أوعى حد يظهر قبل الثلاث دبابات مايعدوا.

فاضل ثلاثون دقيقة على الهجوم، والدي كان بيقول إن إحنـا حا نحارب بعد عشرين سنة، القرار 242,  الليلة حفلة أم كلثوم وطبعا اليهود فاهمين إن إحنـا قاعدين بنسمعها دلوقت، أول مرة حا نشوف اليهود بتوع67 ، قالوا عليهم الجيش الأسطورة. طول عمري مـن وأنا عيل نفسي أكون ضابط صاعقة، الوقت طويل قوى، الناس كانت بتقول علينا نكت.

-         بص بالنضارة، شايف الواد اللى قاعد بيسمع الراديو ده.. حاتبتدى بيه ياسماعين، إذا جه

     معاك كان بها وإذا عصلج خلص عليه، ومن غير صوت.

-         حاضر يافندم.

حد يصدق إن إحنا على أرض سينا ثاني، حسن الغمرى ضابط هايل بس خايف عليه من اندفاعه، صوت الدبابات أبتدأ يظهر، ندر مائة ركعة يارب لو العملية نجحت، الله يرحمك يا أمي كنت طول عمرك خايفة عليّه من حكاية الصاعقة وحشتينى قوى، دى أخر دبابة في الدورية، يارب دى أول عملية، يسر ولاتعسر

-         دقيقة ياحسن ونبتدى.

-         حاضر يافندم.

-         خلليك ورا أسماعين 10 خطوات ياعرابي تحميه لغاية مايوصل للدشمة.

-         يافندم حافظين كل حاجة.

-         ياللا يا رجالة.

-         سليمان وهاشم أوعوا حد يخرج من باب الدشمة.

-         كتفه يااسمعين… ينصر دينك ياأبو السباع.

-         يا نقيب حسن الدشمة صحيت.

-         القنابل ياسلامة.

-         دب صباعك في عينه يا عرابي علشان يبطل صريخ.

-         بطل الرشاش بتاعهم اللي في اليمين ده.

-         مبروك يافندم النقيب حسن جاب أتنين منهم.

-         بسرعة يا حسن على القارب.

-         إسماعين الراجل بتاعه مغمي عليه.

-         شيلوه بسرعة على القارب .. معاهم  يا برعى.

-         فيه صوت دبابة جايه، سامعه يافندم ؟.

-         العملية كده تمام ياللا يا رجالة علي القوارب.

-         ألو أسد ألو أسد … أزرق 20 العملية تمام متجهين للقوارب.

-         يافندم الدبابة شمالنا أهه 800 متر تقريبا.

-         سليمان وهاشم خليكوا معايا والباقي يكمل.

-         لازم نعطل الدبابة يا هاشم إن شاء الله 5 دقائق، القنابل حا تخليها تقف شويه.

-         الحق يا سليمان النقيب أحمد انصاب.

-         الحمد لله المدفعية بتاعتنا ابتدت أهه، الدبابة رجعت ورا التبة اللى في الشمال.

-         شيل معايا يا هاشم، بسرعة.

-         سلامتك يافندم.

-         الناس…… رجعت ؟.

-         القوارب كلها رجعت يافندم، فاضل القارب بتاعنا . وإحنا خلاص على حرف القناة.

-         بسيطة إن شاء الله يانقيب حسن هو بخير.

-         بسرعه الدكتور وعربية الأسعاف.. يا حبيبي يا أحمد، من واحنا في الكلية ماسبناش بعض.

-         إيه يا اسمعين، ده وقت عياط.. بسرعة حُطه في البطانية، واطلع بيه على المستشفى، وأنت  خليك معاه يا حسن.

-         حسن……. الناس.. كلها….. رجعت ؟.

-         كلهم رجعوا يا أحمد والعملية نجحنا فيها100%.. وأنت بس استريح وما تتكلمش.

القمر استخبي في السحاب ، المسافة عشرة كيلومترات للمستشفي، الأخ الأكبر لأربع أخوات بنات، فات 22 شهر على حرب 67 .. القتلي اليهود ثمانية على الأقل والأسرى اثنان، النبض 45 ، زود السرعة يابنى ، كباية الشاى السخن ، البرد جامد قوى، النبض بقي 30 …..

-         أنت ياحسن اللي تبلغ أهله، لأن أنت برضه كنت صاحبه وعارفهم ، ألف رحمة ونور عليه وماتنساش تعمل شهادة بالرشاش اللي وقع في الميه.

شهادة وفاة رقم832 /6 ، محضر جرد عهدة شخصية رقم 47، سركي معاش 127/1 ، إجمالي المبالغ المستحقة للورثة 1364 جنيه

-         بند أوامـر رقم 851 استشهد النقيب أحمد على إبراهيم محمد بتاريخ 12/4/1969

    وتعين النقيب حسن محمد الغمرى قائدا للسرية 17 صاعقة اعتبارا من………….