رُفقاء السلاح
بقلم/ نسمة فتحي سراج




تربُطهم علاقات أقوى من الدم وتجمعهم كتيبة.
يتشاركون النوم والطعام وأكواب الشاي وفناجين القهوة، يتقاسمون الحُزن والفرح والقلق والحماس والنصر والفقد والوداعات المستمرة واللحظات التي يكتُب فيها التاريخ قصص لمجهولين على الأرض ولكن تعرفهم السماء ..
أنهم رفقاء السلاح .

- ياشباب جبتلكم أحلى فطار يلا على الاكل.. قوم يا احمد أعملنا أنت الشاي.
- حاضر من عنيا .. هاروح أنده على بقية الدفعة علشان يفطروا.

" اجتمع رفقاء السلاح على إفطارهم المعتاد الذي يكون دائما وقتاً ثرياً لأحاديثهم اليومية وحكاياتهم التي لاتنتهي. "
ودار بينهم حواراً طويلاً ..

- فاكرين أخر عملية طلعناها.
- كانت صعبة بس ربنا كتبلنا النصر والحمد لله.
- الحمد لله .. بس خسرنا أصحاب غاليين أوي ربنا يتقبلهم شهداء .
- أنا دايما بسأل نفسي هو لسه فيه حد فاكرنا ولا فاكر الشهداء !
- أكيد طبعا فيه كتير جدا مش ناسيين ولا عمرهم هاينسوا, بص شوف اللى بيحصل حواليك وعلى حدودك وأنت هاتتاكد أن الناس عارفة قيمة بلادها وجيشها ورجالتها.
-بس آفة العالم النسيان !!
- ياسيدي وينسانا العالم ! كفاية اوي أننا عارفين إحنا بنعمل أيه، ورسالتنا واضحة لينا وعقيدتنا من حديد وهدفنا نوصل بلادنا لبر الأمان حتى لو بنعيش أيام صعبة.
احنا لا بيهمنا نكون نجوم ولا طريق التريندات والمزايدات يعرفوا طريقنا ولله الحمد ..
احنا هو ده طريقنا وسكتنا ومكملين على درب رفقاء السلاح .

- تعرف، انا بسمع ناس كتير اوي بتقلل من قيمة جيوشها! وبتستهين بيها وعملاها مادة للدعابات والسخرية !
- للأسف الوعي في ذمة الله الا من رحم ربي، طول ما السوشيال ميديا وأبواق الفتن وكل ماهو تافه محاوطك وهدفه تضليلك وانت مش متسلح بالمعرفة ولا الفهم يبقى عمرك ما هتدرك قيمة وطنك وأرضك ويعني ايه انتماء والمعاني اللي بيجاهدوا دلوقتي أنهم يحطموها جوا الأجيال الجاية!
وبالتالي لما تقوله جيش وأرض وإنتماء هايضحك عليك ويسخر منك !

ساد جو من الإحباط لدقائق وتوقفت ضجة الطعام بين الأصدقاء وتوقفت الكلمات لبُرهة.
هنا تدخل احدهم بعدما أنهى كوب الشاي الذي كان يحتسيه ..

- ياشباب مالكم قلبتوها دراما كدة وايه نبرة التشاؤم دي, لعلمكم بلدكم فيها ملايين عارفين قيمة البلد وأرضها وجيشها وفيه معركة وعي بيشتغلوا عليها.. معركة وعي مابتخلصش ومش هاتخلص !

- تفتكر الناس عارفة كل حاجة عننا ..!
يعرفوا أيه عن حياتنا وعن لحظات استشهاد أصحابنا اللي فجأة وهو جنبك تبص تلاقيه سلّم الروح وسال دمه الطاهر على الأرض، تعرف إيه الناس عن عيون صاحية مابتشوفش النوم بتحرس أرضها ومتبته في سلاحها وبينها وبين نفسها عهد وقسم لا النصر أو الشهادة!
طيب يعرفوا أيه عن معارك طويلة عشناها علشان مانسمحش للخونة والجبناء انهم يمسوا تراب البلد دي!
ياترى الناس عارفة حكايات أجيال قديمة حاربت وعاشت سنوات الهزيمة المؤلمة ونشوة النصر واتكوت بنار الحروب وصنعت نصر بفضل الله ورجالها المخلصين لسه لحد دلوقتي نازلين تشكيك فيه لأنه كان معجزة عاجزين لحد دلوقتي عن تصديقها!
ياترى يعرفوا كام كوباية شاي جمعتنا في الليل، شربناها مع اعز رفقاء وطلع النهار من غيرهم! وحكاياتنا وقصصنا وأحلامنا وتضحيات رجالنا اللي كل واحد فيهم محتاج كتاب تاريخ لوحده!!

عاد الصمت مرة أخرى...
- معاك حق في كل كلمة .. يمكن يكون مكتوب علينا أننا نفضل مجهولين أحنا وتضحياتنا وماحدش بينتبه لينا الا لما بيكتبوا أسامينا في سجلات الشهداء ولا لما تتحط الشارات السودا على طرف الشاشات!
بس أقولك حاجة, كل ده مابيهمناش، لأننا أقسمنا على حب الوطن ورضينا نكون سندها وضهرها، لابيهمنا رصاص ولاعقول متطرفة عاوزة تاخد البلد لمتاهات ولا خيانات وتحريضات من قنوات ودول كبيرة ساهمت في استشهاد اعظم رجالنا اللي علشانهم مكملين وبتارهم واخدين.
اوعى تكون ناسي يارفيق أن مصر فضلت تحارب الأرهاب لوحدها نيابة عن العالم وماحدش وقتها وقف جنبنا ولا سمعنا استنكار واحد ولا شجب زي اللى عمالين نسمعه رايح جاي على أي حاجة بتحصل!
كأنهم كانوا قاصدين مايشوفوش دمنا السايل لاجل أراضينا كانوا بيستنكروا أننا بندافع عن بلدنا ..تخيل كنا واصلين لأيه!
احنا واخدين على كدة ولحد يوم القيامة هانفضل نحرس بلادنا، سيبك من العبث اللي حاصل ..احنا مابيفرقش معانا.

ابتسموا جميعا وعادت الروح المرحة لأجواء جلسة الفطور وهنا قال أحد الرفقاء :
- أهو ده الكلام إللي يفتح النفس على الأكل ياجدعان ويقوي العزايم ويرجع أي روح يائسة للقتال .

- إحنا رفقاء سلاح .. مهمتنا واحدة .. عقيدتنا ثابتة .. بلدنا قدام عنينا ..شامخة وكبيرة ..حمايتها رسالتنا ..حبها مزروع في قلوبنا ..والروح رخيصة لو تكون فداها ..عاشت بلادنا منتصرة ورافعة راسها .. حاميها اللي خلقها ..ومحروسة برجالتها الحاضرين واللي تحت ترابها ..المرابطين دلوقتي على حدودها واللي اتصابوا وفقدوا أجزاء منهم علشانها ..جيل الهزيمة وجيل النصر وجيل معارك الوعي ..
مصر عظيمة بـروح رفقاء السلاح ..
يلا ياابني انت وهو كملوا فطاركم ع السريع ورانا وطن عاوزين نحميه ونحافظ عليه .

بقلمي | نسمة فتحي سراج