مقاتلون مجهولون تعرفهم السماء ج٣

بقلمى | نسمة فتحى سراج

______

فى صباح أحد الأيام وكان موافق يوم ذكرى انتصار أكتوبر ، قام الأب من بدرى شرب قهوته ودخل مكتبه وقعد يرتب مكتبته وكان بيدور على كتب كان وارثها عن والده ، دخل عليه ابنه الكبير ولقاه منهمك اوى فى البحث

- الابن : بتعمل ايه يابابا ؟

- الأب : بدور على مجموعة كتب بتاعت جدك

- الأبن: بتتكلم عن ايه الكتب دى ؟

- الاب : كتب تاريخية وعسكرية عظيمة اوى ، انا فاكر انى حاططها على رف من الرفوف دى

- الابن : وايه اللى فكرك بيها دلوقتى ؟

- الاب : النهاردة ذكرى أكتوبر المجيدة وكنت عايز اقرا شوية ،كان فيها مجموعة ابطال وصورهم يمكن ماحدش يعرفهم لحد دلوقتى .

- الابن : هو لسه فيه حد بيحتفل بأكتوبر يابابا؟

- الاب : طبعا فيه ده فيه ناس مكرسة حياتها لتاريخ اكتوبر وسير الأبطال دول ...... اهو لاقيت الكتب اخيرا ..

" كانت الكتب على رف بعيد ، نزلهم الأب وبدأ يفتحهم وكأن باب من التاريخ بيتفتح ! "

- الابن : يااااه دى كتب قديمة اوى يابابا

- الأب : قديمة شكلا لكن اللى جواها تاريخ عمره ماهيقدم ابدا

- الابن : ده فيه صور كتيرة فى الكتاب ده ، مين صورة البطل ده بقى ؟

- الأب :  دى ياطفلى الكبير صورة العريف (مجند عزيز فهمى ابو زهرة )

من ابطال اكتوبر ، الكتيبة ٦٤١ م د الفرقة ١٩ الجيش التالت الميدانى ، كان من الابطال اللى عبروا مع الكتيبة يوم ٧ اكتوبر وكان متميز فى قيادة طاقم المدفع المضاد للدبابات وفى التصدى لدبابات العدو .

- الابن : عظيم اوى .. صورة نادرة وجميلة، فيه كمان صورة جنبها لمقاتل تانى

- الاب : ايوة ده البطل (مجند محمد ابو شعيشع منصور )البطل ده قضى ٨ سنين فى الجيش وحضر نكسة ٦٧ وانتصار ٧٣ وكان من اوائل الرجال اللى عبروا القناة وكان ربنا يبارك فى عمره معاه شهادة ( قدوة حسنة) لانه كان مقاتل خلوق .

- الابن :تعرف يابابا أعظم حاجة بتميز الابطال دى ايه ؟ انهم كانوا محاربين بأخلاق عظيمة وعقيدتهم ومبادئهم خلقت منهم ابطال حقيقيين .

- الاب : ده حقيقى . كلهم اتربوا فى بيوت تعرف الأصول والشهامة والجدعنة ولما اتجندوا اتعلموا فى الجيش ازاى يكونوا رجالة ويحافظوا على اللى اتربوا عليه ..

شوف كدة الصورة دى ..لمقاتل عظيم اسمه الشهيد (سمير عبد الله عبد ربه )

- الابن : وكانت بطولته ايه ..احكى يابابا عاوز اسمع

- الاب : مع ابتسامة ..البطل ده طلع على دبابة إسرائيل...ية كان هدفها تدمير قيادة الجيش التانى الميدانى وكانت ناوية تحتل الإسماعيلية قام مدمرها بقنبلة RPG43 واستشهد على إثرها .  هو ورفاقه كان ليهم دور عظيم فى احباط هدف الغرب فى احتلال القناة وقت حدوث ثغرة الدفرسوار وكانوا على بعد أمتار قليلة منها .

- الابن :ياااااه على العظمة ..بطولة تستحق تتعمل فيلم وثائقى والله يابابا ..على الأقل الأجيال تلاقى قدوة تتمسك بيها مش زى العبث اللى احنا فيه ده !

- الاب : رغم محاولات طمس هويتنا وإضعاف معنوياتنا بالتقليل من انتصارنا إلا أن المحاولات مستمرة من ناس كتيرة بتحاول تكتب عن التاريخ ده وتوثيقه ، التاريخ مابيموتش ياابنى وله حراسه .

- الابن : قعد يقلب فى الصفحات ، بص كدة البطل ده اسمه

(  عبد السلام حسن شيكو )

- الاب : ده مقاتل من مقاتلى اكتوبر سلاح المهندسين كبارى وشارك فى حرب ٦٧ والاستنزاف واكتوبر ٧٣ واتوفى فى ٢٠٠٨

- الابن : ياااه مقاتل عاصر اهم مراحل التاريخ العسكرى ، ياريتنى كنت عاصرته فى زمنا ده رحمة الله عليه خسارة أن ماحدش يعرفهم

- الأب : هافضل اقولها لك ياابنى أن الابطال دول كان عندهم هدف وغاية وحب بلدهم والانتماء إليه هو اللى كان شاغلهم ، مافكروش وقتها يتسابقوا مين هايتكتب اسمه على افيش كتب التاريخ لكن عملوا بشجاعة وضمير اللى يخليهم عايشين للابد وسيرتهم حية

- الابن : معاك حق يابابا ... استنى ماتقلبش الصفحة مين المقاتل ده ؟

- الاب : ده مقدم فنى  (على محمد على راجح )

ده كان مقاتل من أفراد معركة المنصورة الجوية العظيمة وكل بطل شارك فى المعركة دى هو بطل من طراز فريد  ، هابقى ابعتلك لينك علشان تعرف بالظبط ايه هى المعركة دى وازاى الطيارين المصريين من أعظم طيارين العالم

( للتعرف على معركة المنصورة الجوية على موقع المجموعة ٧٣ مؤرخين )

http://group73historians.com/%D9%85%D9%84%D9%81-%D8%A7%D9%84%D8%A8%D8%B7%D9%88%D9%84%D8%A7%D8%AA/90-%D8%A7%D9%84%D9%84%D9%88%D8%A7%D8%A1-%D8%B7%D9%8A%D8%A7%D8%B1-%D9%86%D8%B5%D8%B1-%D9%85%D9%88%D8%B3%D9%8A?showall=&start=3

- الابن : لازم هاقراه ان شاء الله .. فيه كمان مجموعة مصورة فى الفصل ده .

- الاب : دى صورة المقاتل (احمد صلاح عبد الرحيم)

  من دمياط كفر سعد ، سلاح المدفعية شفاه الله وعافاه .

والصورة اللى بعدها للمقاتل

 (فتحى رضوان حموده ) كان من ابطال ٦٧ واتصاب فى الثغرة حوالى ٥ إصابات وكان من ضمن فريق المظلات رحمة الله عليه

والصورة دى للبطل(محمد على محمد عبد الله )من المحلة وكان سلاح دفاع جوى واتجند من سنة ٧٠ لحد ٧٤ وقبل التجنيد كان بيشتغل فى شركة مصر للغزل والنسيج

قسم كهربا ورجع ليها بعد تسريحه من الخدمه العسكرية واتوفى فى سبتمبر ٢٠٠٩ رحمة الله عليه

والصورة دى المجند (فتحى عبد الحسيب محمد)

 كان سلاح الدفاع الجوى فى أكتوبر مشغل ردار P15 السوفيتى وكان له دور فى التمركز مع كتيبته بجبال محافظة السويس علشان يحموا سماها من طيران العدو بارك الله فى عمره ودى بقى صورة العريف (مجند كمال على يوسف جاب الله )

كان من أفراد الضفادع البشرية فى أكتوبر ونال شهادة تقدير وقتها من اللواء مشهور احمد مشهور وكان بيشتغل على لحام مواسير النابلم  فى قاع قناة السويس على خط بارليف .

- الابن : صور عظيمة لابطال عظماء

- الاب : ربنا يرحم الشهداء ويبارك فى عمر اللى عايشين .. انا كل لحظة ببقى فخور وانا يسترجع سيرتهم وبقرا عن اللى تعبوا وعافروا بكل جهد وشرف علشان يستردوا الأرض ، اللى حاربوا سنين طويلة قبل كمان حرب اكتوبر ، احنا ادهشنا العالم ازاى كنا بنحقق معجزات وسط إنكسارات الهزيمة اللى ممكن تقتل اى نقطة نور لحد مابفضل الله وجهدهم طلعت شمس النصر

.الرجالة دى تفرط فى روحها ولا تفرط فى سلاحها وأرضها وعشقها لبلدها ، وأولادنا دلوقتى بيكملوا مسيرتهم وبيستميتوا على أرض مش مجرد حفنة تراب لا دى شايلة دم أعظم الرجال  ..الواحد فيهم بس بجيش كامل .. مصر عايشة برجالتها اللى عندهم ضمير

- الابن : انا فخور اوى يابابا بيهم وعاوز وعد بجلسة زى دى نكمل بقية البطولات

- الاب : ان شاء الله هنحكى كتير البطولات كثيرة والمعجزات ما انتهتش والصور اللى من عمر الزمن ده حية مابتموتش

____

بقلمى | نسمة فتحى سراج

© تنويه | مصدر المعلومات من مراسلات الاعضاء لموقع المجموعة ٧٣ مؤرخين فخرا بذويهم